آخر بيوت …. الشاعر مصباح المهدي …موقع صاحبة الجلالة

آخر بيوت ..
دايما بيوت المطرودين ..
من رحمة الله والبشر
أنا مين رماني ..
ف سكة اللي يروح يروح ؟!
يا قلب مفتوح للجروح
سلم مجاز
واخدك على سطوح المجاز
لم اللي عايز تشرحه
فوق اللي عايز تفضحه
وارميه لنار تاكل في جاز
مين قال تشوف
من غير ما تلمس بالإدين ..
خوف اللي خاف ؟!
حجم الأسى في عيون لطاف
متمرمطين !
مين قال ندين بالدين
ويكفر به الشبع والشبعانين ؟!
طالع تشوف !
طالع ؟
أكيد الشخص مجموعة ظروف
غمض عنيك الجوز تشوف
البن محروق بشرتك
لون العنين ..
حتى البياض ..
مكسوف يكون صافي البياض
معكرّ لون الإعتراض
والإعتراض محفوف بملفوف المهالك
ربما تفتح بيبان النار عليك
تقرا : ( ألم نشرح ) لهم ..
مسائل الامتحان
تدخل مذاكر ولا مش ..
لازم تهان
تدفع فواتير كل دول يوم الحساب
دول اللي سارقين البلد ..
من غير حساب
يفضلك انت وبس باب
باب العذاب
” يا أيها الرجل الذي .. “
داخل جهنم لا محيص
ماعرفش ليه لازم تهيص
بين نار ونار
إبليس صبح بالصدفه إبليس..
مش قرار
وحبك عليه الدور ..
وأداه باقتدار
تهرب بجلدك فين
من المكتوب عليك ؟!
مكتوب تمثل دورك انت وبس
ممنوع الخروج ع النص
مهما تكون حويط
لو تنقل الحيط ..
برضه مضروب بينا حيط
ما تخطيهوش !!