حِلمت بحد بيقول لي صباح الخير
………
#مصباح-المهدي
صباح الخير؟؟!!
حلمت بحد بيقول لي
صباح الخير
بلا تكشير
ماقشرشي الغضب فوقي..
ولا خربط في ميت حاجة
كأنه بيعدل الحاجة
اللي ماسكة الكون
حلمت بحد بيطبطب على قلبي
بكف حنون
وبيقول لي
صباح الخير
حلمت بقعدة فوق أعلى جبل وياه
بنتفرج على العالم كأنه علبة الكبريت
فلا جبل الأسى شايفين
ولا سامعين صراخ مساكين
وحاسين بس نبض قلوبنا بأيدينا
مافيش غيرنا في دنيا الله
حلمت صحيت
على مشهد سنان الغول بتضحك لي
نسيت شكل ابتسام الوش)
(نسيت اعمل جدار عازل
مابيني وبين جحيم الغش
حلمت صحيت
ومت صحيت
بعيني رأيت بصحراء السباع قلبي
حبيبتي مفترض قلبي اتشوى مرات
وعدا برجله فوق خيط الصراط مرات
وفي القبر اتنفخ صُورُه وعاد مرات
حبيبتي مفترض أضحك
واوزَّع بسمتين ع الناس
واخوض جوَّة الجحيم صاحي
لحد ما يحملوني الناس
لعاشر مرة بارجع م الممات للموت
لزنزانة
لوحدي باعيش
واقسَّط أجرة السجَّان
لقسطين دم
واصلِّي له بكل يقين
كأن أصح دين ظلمُه
كأنه أجدر الأصنام بإيماني
وانا المجني عليه جاني
تروس الكدب كالطواحين
بكل بجاحة البجحين
عليَّا اتنططوا مَرِحِين
أنا والسجن والسجَّان
مافيش غيرنا
(سحب رمشه ورد الباب )
وقام بجملة الأدوار بفيلم الأرض
بتضحكي قولي للدوشة
ماتدْوِشْناش
قضينا كام سنة ببلاش
وقبل ما يسحبوا المية
اللي في المواسير
وقبل ما يشفطوا المية في بطن البير
تعالي نعدي م السور الكبير نحلم
